БОАЖ-ын Сайд Б.Бат-Эрдэнэ, БНСУ-ын дуучин Ким Хён Жун, Монгол Солонгосын хамтарсан арга хэмжээ зохион байгуулагч “Эвандис” энтертайментийн Үүсгэн байгуулагч Ko Со Хуныг албаны хүмүүсийн хамт хүлээн авч уулзав.
Уулзалтаар хоёр орны соёл, аялал жуулчлалын асуудлаар санал солилцохоос гадна уран бүтээлчдийн хамтарсан тоглолт, фестивалийг зохион байгуулахад Ким Хён Жун хамтран ажиллахад бэлэн гэдгээ илэрхийллээ.
Дуучин Ким Хён Жун Монгол Улсад анх удаа ирж байгаа ба танай орны тухай богино хугацаанд их зүйл мэдмээр байна, мөн маргааш болох тоглолтдоо сэтгэл догдолж байна гэв.
Уулзалтын үеэр Монгол Солонгос хоёр орны дунд олон жилийн турш гүүр болон ажиллаж, соёлын хамтын ажиллагааг өргөжүүлэх, хамтарсан олон арга хэмжээг амжилттай зохион байгуулсан тул “Эвандис” энтертайментийн Үүсгэн байгуулагч Ko Со Хуныг БОАЖ-ын Сайд Б.Бат-Эрдэнэ “Аялал жуулчлалын ЭЛЧ”-ээр томилж БАТЛАМЖ гардуулав.
Солонгосын алдарт дуучин, “F4” киноны жүжигчин Ким Хён Жун болон MC Sniper, Bloo, Монголын талаас дуучин Чойжоо, Vandebo нарын хамтарсан “Your Valentine” тоглолт маргааш “Буянт-Ухаа” спорт цогцолборт болно.
Эх сурвалж: БОАЖЯ
